Amari bući akana teljarel!

Palav andraluno dijalog e Rromane amalimasa thaj dijalogosa e politikane šerutnenca katar e losarimaske liste, o pokret Opre Roma Srbija kerrda maj dur e kampanja “ Dobro za Rome, dobro za Srbiju”. Adjes o pokret Opre Roma Srbija da troma ekmije manušengo te inklen po krrlipe thaj kućaren pengo krrlo. Pe kava losaripe sas o imperativ te e manuša inklen po losaripe ando so maj baro brojo, te ačhavas bilo savi vrsta katar o pritisak thaj manipulacija pe Rromane krrlarja, te e Rrom slobodno losaren andaj pengi paća. Kodoja si važno palaj Rrom, sar vi palaj demokratsko legitimnost losarimaski ande Srbija. O pokret Opre Roma Srbija pratisarrda thaj analizirisarrda inklimost pala penge pristalice ande 12 thana, ande Srbija   (Aleksinac, Prokuplje, Pirot, Smederevska Palanka, Bor, Bač, Zaječar, Surdulica, Vladičin Han, Vranje, Pavlovac thaj Kruševac ).  O procento inklimasko amare krrlonengo ande kodola lokacije si 89% so sikavel but baro inklimos. Barikane sam kaj sas amen xarrnikimos te ažutisaras ande so maj baro inklimos po losaripe, kerimasa katar e dijalogurja e politikane šerutnenca, javne akharimasa po losaripe dromesa katar e video snimkurja thaj aver vošenca. Naisaras savorrenge kaj ažutisarrde ande kampanja “Dobro za Rome, dobro za Srbiju”.