Državaki griža palaj Rroma
Srbija ando 15. marto anda vanredno stanje. Stanje pe savo amari Država pe vrjama nas xarrniko. Ćaćimaske ande jakha, foroneske katar e Srbija teljaren te daran pušimasa palav trajo ando vanredno stanje, e manušenge branilpe o phirimos, aj kodoja kerrda o trajo aver dzangluno. Kadava vanredno stanje mukhel doš po sa o amalipe. Numa akana tholpe o svato so si e Rromane amalimasa? Dal sas o Rromano amalipe rrapedo te thol pes ando nakh problemonenca katar o vanredno stanje? Dal sas e Rrom getome palaj sa pharimata save o vanredno stanje anda, thaj dal sas amari država detot paćivali palav Rromano amalipe? Gindosa ke o pokret Opre Roma Srbija si o krrlo katar o Rromano amalipe. Kamljam te pušas so e Rrom thaj Rromnja phenen ando vanredno stanje thaj vrjama katar e pandemija. O pokret Opre Roma Srbija si vareko ko inkerel o interes katar o Rromano amalipe, kodolasa kaj pušel so si kodoja so e amalimas ande vrjama katar e pandemija, maj but trubul thaj save si maj ugrozime manuša/šnja? Inkerrdam e dijalogurja thaj aviljam dzi kav gindo ke jekh katar maj bare problemurja si e bi griža katar e država, kaj toma i ande kadala uslovurja e Rromane amalimas naj paj thaj struja. Manuša saven ando 21. veko naj paj thaj struja savi si fundimaske voša palaj trajo jekhe familijake ande vrjama katar e pandemija sikavel e državaki bi griža palaj maj ćorre. Dromesa katar e online dijalogurja sikadam ke kamas vareso te parruvas. Kamas te amaro krrlo ašundol pes. Numa, palaj kodoja trubul amen ažutimos katar e državake bućarrne. Šaj phenas, ke o Rromano amalipe nas ažutisarrdo katar e šerutne ande Republika Srbija. Amari inicijativa sas te bičhalas lil e državake institucijenge save bućaren pes pušimasa katar e maj ćorre aj kodola si: Crveni krst, Centro palav socijalno bući thaj lokalno samouprava. Pašaj kodoja bičhaldam vi dopis e Predsednikoske katar e Republika Srbija, al o palpale svato nas dino. Saro pokret savo vi akana buljol thaj dikhel o interes katar o Rromano amalipe thaj bućarel pes ando thodipe katar o amalipe ando getimos katar e problemurja, sar vi o dikhimos katar o Rromano amalipe ando pravno sistemo katar e phu, o lil bičhaldam gindosa ke avela palpale-svato thaj ke e institucije pindzarena save si kola maj ugrožene ande vrjama katar e pandemija. Ande Republika Srbija si 40% katar e neformalne Rromane naseljurja save naj thodine pe pajeski mreža, so phenel ke 20 000 Rrom trajil bi pajesko. Ande vrjama katar e pandemija kadja vareso šaj mukhelpe, 40% katar e Rrom naj le osnovne voša trajoske. Naj len than pajeske sar vi dezifinkacione voša. E institucije khatek sikaven bi griža na numa palaj Rrom, numa vi palaj sa o narodo kaj trajil ande Srbija. Das godji ke si e Rrom sajekhtune sa e narodosa ande kaja phu, save ći trubun te rigarenpe. Rromano amalipe si jekh katar e maj bare ande Republika Srbija, aj ande sajekhtuni vrjama vi maj ugroženo. Ažutimos katar e šerutne nisar naj, aj dromarrdi kav Rromano amalipe, aj kana si kodova ažutimos si cikno, ke e Rrom si maj goreski stavka pe lista katar o anglunipe kaj država. Kana e Rromen trubul ažutimos katar e država, kana o Rromano amalipe bičhalel lila e državake von čhi len o palpale-svato lendar. Ande medijurja sikavelpe pinta sar o državako sistemo mišto kerel bući ando vanredno stanje, numa e pinta po tereno sikavel ke naj kadja. Pe Srbija avel ćorrimos savo ći našela katar e Rrom. Inker maj gore si kodoja ke e Rrom si sa e vrjama ćorre, aj kalasa avela inker maj gore. Tholpe o pušimos sar o Rromano amalipe inklela po gor kadale ćorrimasa ande vrjama katar e pandemija? Ande medijurja sikado si ke si o staje ande phu lačho, numa naj kadja, so sikavel amenge o rodimos katar e tim liderja save si kotor katar o pokret Opre Roma Srbija pe 14 thana ande Srbija. So sikavel amenge e ćaći pinta, aj e šerutne kodoja dzanen numa andav kodova pučhipe či kerrde khanči. Pašaj kodoja e inicijativa A11 bičhalda apel palaj vlada katar e Srbija palav lipe suge mere, palav arakhipe kolen save si maj ugrožene. Ando 20. marto phanglimasa timosa katar o socijalno uključivanje thaj ciknjaripe ćorrimasko katar e vlada Republika Srbija, thaj nesave dzangle andaj oblast socijalno vorrtipe kerrdine predlogo katar e mere palav arakhipe katar o koronavirus thaj dine les e vladake katar e Republika Srbija. Numa, ći pašav kodova apel e država ći kerrda khanći te ažutil e Rromenge. Rromano amalipe si jekh katar e maj ugrožene saven naj paj, bi dezifinkacione vošenca, bi zaštitako, bi fundoneske voša palav trajo. E inicijativa A11 ramosarrda e Evropake Krisake palaj manušeske šajimata sar te šaj avel o Rromano amalipe ažutisarrdo katar e vlada Republika Srbija. Apelujilpe po sugipe thaj bi šajipe e Rromengo te inklen po gor kale krizasa savi si bijandi bi manušimasko prema e Rroma. Kadalasa amari država vi sikavel bi griža ando bućaripe sajekhtunesko pravno sistemo ande država. O svato katar Evropsko kris palaj manušeske šajimata savo sas dromarrdo pe vlada katar e Republika Srbija sikavel o ozbiljnost arakhlimasko katar o Rromano amalipe. O apel katar o Evropsko kris trubul ozbiljno te haćarelpe, aj amare vladake ći kadaja naj dosta te kerel kris thaj ažutil e Rromenge. Bi paća katar e Kris palaj Evropake vorrtimata sikavel kazom amari država arakhel e Rromen ande peski phu. Pašaj penzionerja e Rromenge si o ažutimos but trubultano, khonik ći pomenil e Rromen, numa e Rrom korkorro pala pende marenpe.